Лондондаги алкоголь ичимликлар дўконидан қиймати 150 минг фунт стерлинг бўлган 285 йиллик скрипка ўғирланди. Бу ҳақда The Guardian нашри хабар бермоқда.
Полиция баёнотига кўра, жабрланувчи Лондон филармония оркестри мусиқачиси Давид Лопес Ибанез эканлиги аниқланди.
Маълум қилинишича, Лопес 18 февраль куни дўсти билан Ислингтон туманидаги Кенонбери кўчасида жойлашган “Маркиз” алкоголь ичимликлар дўконида дам олган. Ўша кечқурун унинг ёнидаги скрипка ғойиб бўлган. Эркак ўша куниёқ полицияга мурожаат қилган, бироқ бир неча ойлик қидирувлар ҳеч қандай натижа бермаган. Асбоб ҳамон топилмаган.
Лондон полицияси гумонланувчини қидираётганини маълум қилиб, кузатув камераларидаги ёзувларни эълон қилди. Тасвирларда қора кийимдаги шахс қўлида скрипка ғилофи ва ўралган плашни ушлаб, пабдан чиқиб кетаётгани кўринади. Шунингдек, полиция мусиқа асбобининг фотосуратларини ҳам эълон қилган.
“Бу скрипка жуда қимматбаҳо, жабрланувчи учун эса бебаҳо. Илтимос, айбдорни топиш ва скрипкани қонуний эгасига қайтаришда бизга ёрдам беринг”, -дея таъкидлаган полиция вакили.
Маълум қилинишича, скрипкани 1740 йилда флоренсиялик уста Лорензо Каркасси ясаган. Ҳозирги кунда унинг қиймати 150 минг фунт стерлингдан ошади. Бу скрипкани мусиқачига немис тадбиркорларидан бири унинг карьерасига ёрдам бериш мақсадида вақтинча фойдаланишга берган. Скрипка билан бирга учта камонча ҳам ўғирланган бўлиб, улардан бири садаф учли.
Изоҳ (0)